Heb 1 | HneNNC | STEP | पहिली जमाना म, परमेसर ह हमर पुरखामन ले, कतको बार अऊ कतको किसम ले अगमजानीमन के दुवारा गोठियाईस,

Hebrews 1

बेटा ह स्वरगदूतमन ले बड़े ए

1 पहिली जमाना म, परमेसर ह हमर पुरखामन ले, कतको बार अऊ कतको किसम ले अगमजानीमन के दुवारा गोठियाईस, 2 पर ए आखिरी दिन म, ओह हमर ले अपन बेटा के दुवारा गोठियाईस, जऊन ला ओह जम्मो चीज के ऊपर वारिस ठहराईस अऊ ओकरे दुवारा, ओह संसार ला बनाईस। 3 ओह परमेसर के महिमा के अंजोर ए अऊ ओह परमेसर के रूप के एकदम सही परतिनिधि ए अऊ ओह अपन सामरथी बचन के दुवारा जम्मो चीजमन ला संभालके रखथे। ओह मनखेमन के पाप ला सुध करके, स्‍वरग म परमेसर के जेवनी हांथ कोति जा बईठिस। 4 एकरसेति ओह स्वरगदूतमन ले जादा उत्तम ठहरिस, जइसने कि परमेसर ह ओला स्वरगदूतमन ले उत्तम नांव घलो दे रिहिस।

5 काबरकि परमेसर ह कोनो स्‍वरगदूत ला कभू ए नइं कहिस,

“तेंह मोर बेटा अस;
आज मेंह तोला पैदा करेंव।” ^{▼▼भजन-संहिता 2:7}
या फेर ए नइं कहिस,

“मेंह ओकर ददा होहूं,
अऊ ओह मोर बेटा होही।” ^{▼▼2समूएल 7:14; 1इतिहास 17:13}
6 पर जब परमेसर ह अपन पहिलांत बेटा ला संसार म लानथे, त कहिथे,

“परमेसर के जम्मो स्वरगदूतमन ओकर अराधना करंय।”
7 स्वरगदूतमन के बारे म परमेसर ह ए कहिथे,

“परमेसर ह अपन स्वरगदूतमन ला पवन,
अऊ अपन सेवकमन ला धधकत आगी बनाथे।” ^{▼▼भजन-संहिता 104:4}
8 पर बेटा के बारे म ओह कहिथे,

“हे परमेसर, तोर सिंघासन ह सदाकाल तक रहिही,
अऊ धरमीपन ह तोर राज के राज-दंड होही।
9 तेंह धरमीपन ले मया करय अऊ अधरम ले घिन करय;
एकरसेति, परमेसर,
तोर परमेसर ह आनंद के तेल ले तोर अभिसेक करे के दुवारा तोला तोर संगीमन ले ऊपर करे हवय ^{▼▼तेल ले अभिसेक करे के मतलब बड़े आदर खातिर चुनना ए।}।” ^{▼▼भजन-संहिता 45:6-7}
10 ओह ए घलो कहिथे,

“हे परभू, सुरू म, तेंह धरती के नीव रखय,
अऊ तेंह अपन हांथ ले स्वरगमन ला बनाय।
11 ओमन तो नास हो जाहीं,
फेर तेंह बने रहिबे; ओमन जम्मो पहिरे के कपड़ा सहीं जुन्ना हो जाहीं।
12 तेंह ओमन ला चादर सहीं घरियाबे;
अऊ ओन्ढा के सहीं ओमन बदल दिये जाहीं।
फेर तेंह हमेसा वइसनेच के वइसने रहिथस,
अऊ तेंह कभू डोकरा नइं होवस।” ^{▼▼भजन-संहिता 102:25-27}
13 परमेसर कभू कोनो स्‍वरगदूत ला ए नइं कहिस,

“मोर जेवनी हांथ कोति बईठ,
जब तक कि मेंह तोर बईरीमन ला तोर गोड़ तरी के चौकी नइं बना देवंव।” ^{▼▼भजन-संहिता 110:1}
14 का जम्मो स्वरगदूतमन सेवा करइया आतमा नो हंय? हव, ओमन अंय। अऊ ए स्वरगदूतमन ओमन के सेवा करे खातिर पठोय जाथें, जऊन मन उद्धार पाहीं।